Rinnastai yhtysvirkeh

Rinnastai yhtysvirkeh on moine y'htysvirkeh, kudaman kogomukseh kuulutah sintaksiellizesti samanverdazet iččenäzet yksinäsvirkehet. Net yhtistytäh yhtysvirkeheh intonatsien libo rinnastuskonjunktoin avul.

Yhtysvirkeh konjunktanke

Rinnastajat yhtysvirkehet jagavutah eri joukkoloih merkičyksen puoles da sen konjunktan mugah, kudamua käytetäh virkehes:

rinnastajat yhtysvirkehet yhtistyskonjunktoinke:
Pertis kuului gituaran soitto, i silkeskie sih yhtyi naizen iäni. Tuuli ulvoi täytty vägie, da kodvazen peräs rubei räčkämäh jyrygi. Hänel kivettih sivut, sego jallat ollah huonos kunnos. Tämän joukon virkehis enimyölleh ilmoitetah erilazii aigumerkičyksii: yhtenaigastu libo jälletyksellisty teguo.
rinnastajat yhtysvirkehet eroituskonjunktoinke:
Tytötgo ei ehtitty tulla, vai brihačut liijan äijäl kiirehtettih. Sinä libo ruat kai ruavot kunnolleh, libo kino jiäy kaččomattah. Sano sinä, eiga toizet sanotah. Tämän joukon virkehet ozutetah tapahtumien jälletysty libo yhten niilöis tovekse muuttumistu
rinnastajat yhtysvirkehet vastuskonjunktoinke:
Hyvä juohtuu, a paha ni unohtu ei. Olis oksien kuarzijua, ga vähä on puunkuadajua. Rahvas eletäh eri luaduh, vaiku muah mennäh yhtenjytyi. Tämän joukon virkehis ilmoitetah vastukohtazii tapahtumii.
rinnastajat yhtysvirkehet sellityskonjunktoinke:
Ildupäiväl rodih vihmu, ilmaigo piäsköit lenneltih alahan. Vezi oli ihan jiähine, äski käit kohmistuttih. Tämän joukon virkehet sellitetäh syyn da sen jälgehyön kosketuksii.

Rinnastajah yhtysvirkeheh kuulujat yksinäsvirkehet eroitetah toine toizes pilkul.

Yhtysvirkeh konjunktattah

Yksinäsvirkehet voijah liittyö toine toizeh da yhtistyö yhtysvirkehekse konjunktoittahgi. Silloi paistes net virkehet eroitetah intonatsiel, a kirjuttajes erilazil välimerkilöil - pilkul, pilkul čökkienke, kaksosčökkiel, viivazel.

Konzu yhtysvirkehes ilmoitetah yhtenaigazesti tapahtujua libo jälletysti tapahtujua teguo, sit virkehet eroitetah toine toizes pilkuloil:
Lehti ruostunuh hil'l'azeh pakkuu, koivu alastoi säräittäy oksii. Kirjau harakku sygyzyy čakkuau, vihmu pizaril ikkunah čoksau. Jiävii talvi tavan pahan, tuuli pihua pyhkiy, vilu seinih juhkau.
A ku yhtysvirkehen ozat oldaneh pitkät, kazvanuot, ga sit virkehien välis käytetäh pilkuu čökkienke:
Ehtäs tuhu lundu siegloi, soitti tuuli tuohitorvel, nygöì pakkaine, ku niegloil, puretlelou neniä, korvii. Pakkaine ku tulipalo, taivasrandu ruskies mujus, huondestu myö joga taloih suomittu on lumikujot. (V. Brendojev)
Konzu yhtysvirkehes toine virkeh sellittäy enzimästy, tävvendäy sidä libo ilmoittau syydy, sit virkehien välis käytetäh kaksosčöketty:
Ezinehet kaimattih oma formu: kai ozuttihes yhteläzekse muzavakse tukukse. Kaikin tietäh: sen ristikanzan syväin on avvoi toizele. Kezäl kyläs minä en voi muata:joga kohtu on täyzi pin'oidu.
Konzu yhtysvirkehes toine virkeh ilmoittau midätah vastukohtastu libo merkiččöy jällečysty, sit virkehien välis käytetäh viivastu:
Kezä andau - talvi ottau. Huigien kaimuat - uuttu et lövvä. Hallot kylyh kannettu, viriteksel varustettu, vuotan - käsky annetah. Avain ikkunat - perti täydyi havvumečän aromuatoil.