Aktiivan I partisiippu

Nominatiivas aktiivan I partisiipan tunnus on -i, sen rinnal käytetäh tunnustu -ju, -jy: ostai, ostaju, kävelii, kävelijy. Toizis sijois aktiivan I partisiipan tunnus on -ja, -jä.

Tunnus liittyy.

(lujah) vokalivardaloh: kandai, kandaju (kanda-ja-), kaččoi, kaččoju (kačo-ja-), kuččui, kuččuju (kučču-ja-), työndäi, työndäjy (työndä-jä-), pidäi, pidäjy (pidä-jä-);
diftonguvardaloh: tuoju (tuo-ja-), pidäi, pidäjy (pidä-jä-), katkuaju, (katkua-ja-), hyppiäjy (hyppiä-jä-), kaduoju (kaduo-ja-), tukkuoju (tukkuo-ja-).

Aktiivan I partisiippu taibuu sijois da luvus. Taivuttajes

vardalon loppuvokali -e vaihteleh i:nke (e-i) tunnuksen -ja, -jä iel.
lugie (luve-, luge-): lugi-ju, lugi-ja-n, lugi-ja-l,
lähtie (lähte-): lähti-jy, lähti-jä-n, lähti-jä-l,
sanella (sanele-, sanel-): saneli-ju, saneli-ja-n, saneli-ja-l
mennä (mene-, men-): meni-jy, meni-jä-n, meni-jä-l
monikon tunnuksen i:n iel -ja, -jä -tunnukses häviey loppuvokali -a, -ä:
kaččoi (kaččoja-): kaččoj-i-en;
työndäi (työndäjä-): työndäj-i-en;
hyppijy (hyppijä-): hyppij-i-en;
syöjy (syöjä-): syöj-i-en;
kävelijy (kävelijä-): kävelij-i-en;
nägijy (nägijä-): nägij-i-en.

Taivutammo partisiipat kazvai da menii yksikös da monikos:

Nominatiivu	kazvai	menii	kazvajat	menijät
Genetiivu	kazvajan	menijän	kazvajien	menijien
Akkuzatiivu	kazvajan	menijän	kazvajien	menijien
Partitiivu	kazvajua	menijiä	kazvajii	menijii
Essiivu	kazvajannu	menijänny	kazvajannu	menijänny
Translatiivu	kazvakse	menijäkse	kazvajikse	menijikse
Inessiivu	kazvajas	menijäs	kazvajis	menijis
Elatiivu	kazvajaspäi	menijäspäi	kazvajispäi	menijispäi
Illatiivu	kazvajah	menijäh	kazvajih	menijih
Adessiivu	kazvajal	menijäl	kazvajil	menijil
Ablatiivu	kazvajalpäi	menijälpäi	kazvajilpäi	menijilpäi
Allatiivu	kazvajale	menijäle	kazvajile	menijile
Abessiibu	kazvattah	menijättäh	kazvajittah	menijittäh
Komitatiivu	kazvajanke	menijänke	kazvajienke	menijienke
Prolatiivu	kazvači	menijäči	kazvajiči	menijiči
Instruktiivu			kazvajin	menijin

Aktiivan 1 partisiippu merkiččöy jatkujua libo loppumattomua ruandua.
Heijän perehes kaikin ollah ruavon suvaiččijat rahvas.
Karjalan kielen luokas kaikin ollah hyvin opastujat lapset.
Tuatto akkiloiččou kazvajua peräntiedy.
Sualistujan rugehen keskes on äijy ruiskukkastu.
Vahnoi pajoloi pajattai baboi puaksuh kävyy meile.
Äijäl bauhuajile brihaččuloile annettih ruado.