Kirjoin skanniruičendas

Skanniruittuloin kirjoin tallendamizeh djvu on parembi formuattu migu ezimerkikse fotokuvaformuatat libo pdf, se kučistau tekstat hyväluaduzinnu äijiä sumbembah. Djvu-formuatas kaksisaduasivuhine tekstu voi kučistuo viideh megatavuh - yhtelläh fotokuvat terväh kazvatetah koguo. Ga pidäy tiediä kui skanniruija ku tulos olis hyvä da ruado olis kebjei. Ruadoprotsessu pidäy hyvin smiettie edukädeh, ku skanniruittu kuva pädis djvu-formuattah kučistettavakse da sidä ei jälgehpäi tarviččis käzitellä kuvankäzittelyohjelmal.

Valliče skanneris tarkus 600 dpi da värikse binaarine mustuvalgei (ei harmai libo värilline - kuvien skanniruičendu erikseh). Sivun kogo toinah voi olla 3200x4800 pikselua.
Kačo kuspäi skanneris on lampu, ku sivun sellänpuoleine reuna ei jiäs liijan muzavakse: muzavu reunu => jälgikäzittely kuvankäzittelyohjelmal
Valliče oigien kogoine aloveh da azeta kniigu suorah, ku sidä ei tarviččis jälgehpäi kierdiä kuvankäzittelyohjelmal.
Ku kuvas ollou tačmoi, skanneriohjelmu toinah voi net pyhkie enne tallendustu. Vähäine muzavus sellän vieres sežo voi hävitä skanneriohjelman tačmanpoistandal (despeckling).
Tallenda binaarizennu pbm libo tiff formuatas, tiffas voi käyttiä kučistustugi. Sivun kogo kučistetus tiff-formuatas toinah on 200-300 KB.

Hyvin skanniruittuu kuvua ei tarviče jälgehpäi kohendua. Djvu (alias jbig2) ohjelmal täyzi tekstusivu kučistuu 10-20 kilotavuh. Erähičči 600 dpi kuvat kučistutah djvu-ohjelmal parembi migu huonombat 300 dpi - mindäh ostua huonombua kallehembal?! Livaimel kaččojen hyvin skanniruittu da kučistettu sivu voi ozuttuakseh selgiembänny migu vahnan kniigan alguperäine sivu da tačmakas sivu.

Konzu kirju on hyvin skanniruittu, sidä voi ruveta kučistamah djvu-formuattah. Olen käyttänyh ilmastu djvu-libre ohjelmupakiettua.

Kučista sivu (djvu-libre pakiettua käyttäjes) komendol
cjb2 -dpi 600 -losslevel 200 sivu.pbm sivu.djvu
Täs on käytetty kaikkii ahnahimbua kučistustazuo 200. Ku kučistajes roinnou hairehii (ezim. u da n ruvetah sevoittumah), valliče pienembi lugu libo kirjuta "-losslevel 200" sijah "lossless".
Sivut pidäy sit vie toizel ohjelmal (djvu-libre pakietas) djvm "siduo" kirjakse. Mostu sivottuo kirjua voi lugie livaimel, kudamas on djvu-plugin.
Kirjan voi muuttua kirjuttimel tulostettavakse tiijostokse djvups ohjelmal.