Enämbi kolmie šadua vuotta karielazet elettih Oniegan i Luadogan järvilöin luona. Hiän randa oli bohatta kalalla, zvierillä, rauvalla i muulla.
Švedat i hormat rigeneh vojuidih toine toizenke karielan mualoista. Jogohine staraičči kuin voit enämmän kerätä karieloista veduo.
Karielan eländä oli ylen paha. Kuda kumbazet karielat uijittih elämäh švedoin muakundah, štobi piäššä näistä voinista.
Šuuri paikka karielan mualoida oli otettu hormin muakunnalla. Švedat napadaidih karielazih, gruabittih hiän taloloida i tapettih kaikkie kylän eläjie. Ei annettu potačkua i hormat. Rigeneh karielazet noustih hormilla vastah.
Tverin luona oli šuuri läzimine, rahvas kuoldih šavoin. Šualla viršalla tyhjettih paikat. Hormin pravitel'stva tällä tyhjällä paikalla työndi karieloida elämäh.
Kakši viigodua tästä oli hormin pravitel'stvalla. Parahilla karielan paikoilla ruvettih elämäh hormat. Tiälä Tverin luona karielazet ruvettih tyhijildä paikoilda veduo makšamah.
Spokoinoimmakši ozuttuači eländä karielazilla uvvella kohalla. Enämmät puolie karieloida tuldih elämäh Tverin gubern'ah. No, spokoinoimma oli vain ylen kodvazen. Väliän kaikin hyö puututtih bajarsinan, da udielan nevol'ah.
Šuuri nevol'a lieni karielalla eliäššä hormilla keššeššä. Okt'abrin revol'uciih šuat karielazet oldih nagrona i vevon makšajana cuarin pravitel'stvalla.
Vain Okt'abrin revol'ucii ando karielazilla vällän i abun opastuo omal\-la kielellä, kažvattua omua kirjutusta i piäššä iellizestä keyhyöstä.